Diario - Tema 5

Boas a todas e a todos! 

 

Nesta entrada falarei dos contidos tratados no tema 5 da materia As Linguas Estranxeiras no Contexto Español e Internacional, titulado O deseño curricular base para as linguas estranxeiras. Neste tema tratamos fundamentalmente o currículo, as competencias das diferentes administracións educativas, e o deseño curricular que presentan a LOE e a LOMCE.

 

En primeiro lugar, indagamos na definición de currículo e nos elementos deste na ESO e no Bacharelato (obxectivos, competencias, contidos, estándares de aprendizaxe, criterios de avaliación e metodoloxía didáctica). Penso que é de vital importancia para os docentes coñecer a fondo o currículo da materia que van impartir. Falamos tamén das competencias clave, que foron incorporadas por primeira vez no currículo na LOE, e que hoxe en día están tan presentes en todos os ámbitos da ensinanza, de acordo tamén coa regulación da Unión Europea. Estas pódense clasificar en:

• Competencia en comunicación lingüística (CCL)
• Competencia matemática e competencias básicas en ciencia e tecnoloxía (CMCT)
• Competencia dixital (CD)
• Competencia aprender a aprender (CAA)
• Competencia social e cívica (CSC)
• Competencia en sentido da iniciativa e espírito emprendedor (CSIEE)
• Competencia en consciencia e expresións culturais (CCEC)

Aínda que o ideal é traballar tantas competencias como sexa posible nas actividades que se realicen na aula de linguas estranxeiras, a competencias nas que máis se afonda é, evidentemente, a competencia en comunicación lingüística (CCL), mais todas elas se poden tratar de diferente maneira na aula de lingua estranxeira. O ideal é poder organizar na aula actividades nas que se traballen todas elas, e o certo é que mesmo nunha actividade sinxela é posible que se inclúan máis de unha competencia. Por exemplo, nunha simple actividade de búsqueda de información para un traballo en inglés, xa estarían traballando, ademais da CLL, a CD e a CAA.

 

Algo que me pareceu especialmente útil e que descoñecía máis do que pensaba son os roles que desempeñan as diferentes administracións educativa nos diferentes graos de concreción curricular. Tanto o Goberno do Estado como o Ministerio de Educación e o Goberno Autónomo, a pesares de formar parte do primeiro grao de concreción curricular, encárganse de determinar diferentes partes do currículo. Isto pode resultar especialmente útil para saber a onde acudir en caso de dúbida. 

 

Finalmente, adentrámonos no deseño curricular da LOE e da LOMCE para a Educación Secundaria Obrigatoria, o Bacharelato, a Formación Profesional e as Escolas de Idiomas. En canto a esta última, resultoume curioso saber que en España existe ensinanza regrada de idiomas que nos poden resultar «pouco comúns», como o coreano e o neerlandés. En canto a isto, gustaríame dicir de maneira anecdótica que eu fixen unha estancia Erasmus en Zadar (Croacia), e na universidade de humanidades na que estudaba, impartían galego e catalán como linguas complementarias (mais obrigatorias para obter a carreira) no grao de Filoloxía Hispánica. Nunca imaxinei que acabaría falando con alumnos e alumnas croatas sobre cantigas de amigo. Sen dúbida, coñecer estes dous idiomas cooficiais axudaralles enormemente ao seu desenvolvemento cultural en español.